Euskal Herriko Trikitixa Elkarteak eta Azpeitiko Udalak elkarlanean antolatzen dute jaialdia. Martxoaren 18an, 17:30etatik aurrera panderoa eta trikitixa izango dira protagonista. Halere, antolatzaileek nabarmendu dute beste zenbait instrumentu ere entzun ahal izango direla.

Egitarauaren berri emateko Euskal Herriko Trikitixa Elkarteko eta Azpeitiko Udaleko ordezkariek agerraldia egin dute ostegun goizean. Izen ezagunak eta ez horren ezagunak uztartzen saiatu direla aipatu du EHTEren antolakuntzako kideak. Azpeitiko Kultura batzordeburuak, berriz, azpimarratu du trikitia Azpeitiaren eta Euskal Herrian “iraganaren eta orainaren” parte garrantzitsua dela.